Сашко Велков, еден од основачите на оркестарот „Дрим тим“ во првата половина од оваа година реализираше два нови соло проекти. Првиот е неговото најново инструментално дело, кое, како што вели, е работено со мерак и многу љубов и е посветено на неговиот драг колега, девер и другар Далибор Минов, кој, за жал, прерано го напушти овој свет. Вториот, пак, е балканската музичка вечер  за сите вљубеници во звукот на хармониката.

„Majestik accordion“ е моето најново инструментално дел кое го работев малку подолго, но едноставно она што сакав да го добијам си бараше малку повеќе време и работа. Музиката и аранжманот се мои, мастерингот е на Љупчо Соколовски, додека видеото го работев со Столе Стоилов од Флај видео продукција. Станува збор за мое, авторско оро кое е правено во српски стил со фигури од балканското подрачје. Се надевам дека на публиката ќе ѝ се допадне проектот кој, пред сè, е правен со многу љубов и емоции, вели маестро Сашко Велков.

Балканската музичка вечер ќе се одржи на 20 март во ресторанот „Амор“ во Кочани со почеток во 20 часот.

Идејата да се одржи ваква музичка вечер и кај нас ја имав одамна. Првично требаше да бидеме само хармоникаши, но во разговор со колегата, маестро Пламен Димитров од соседна Бугарија решивме да го поканиме и големиот маестро на виолина Георги Јанев, кој е меѓу најдобрите на Балканот. Почетокот на вечерта е најавен во 20 часот и тоа со настапот на мојот наследник, мојот син Давид кој ќе се претстави пред публиката со околу 20-минутен настап. Иако е млад наградите веќе доволно зборуваат во која насока се движи неговата кариера. Потоа вечерта со својата виртуозност и присуство ќе ја збогати и маестро Милан Завков, кој ќе се претстави во ревијалниот дел и во придружба на Стојанче, клавијатури, и Гале, тапани. Ова е навистина реткост да се имаат гости од ваков ранг на едно место и ќе биде интересно и да се види и чуе сè што подготвуваме и, секако, делот за кој всушност ќе биде резервиран и крајот од вечерта, односно нашиот заеднички настап кој ќе биде своевидно натсвирување мое, на Пламен и Георги, вели Велков.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.