На верниците кои ќе присуствуваат на миса во црквата „Свети Петар“ и другите папски цркви во Ватикан и Рим ќе мора да им се проверува телесната температура, како дел од мерките за спречување на ширењето на коронавирусот, соопшти Ватикан.

Британските медиуми јавија дека од понеделник продолжуваат јавните миси во црквите во Италија, но под строги услови утврдени со протоколот што минатата недела беше потпишан меѓу италијанската бискупска конференција и владата.

Црквата „Свети Петар“ во Ватикан, а и другите три папски базилики во Рим – „Свети Павле“, што е надвор од ѕидините, „Свети Јован Лотеран“ и „Света Марија Велика“, имаат суверен, екстериторијален статус и официјално не се дел од Италија.

Новите правила за црквите во Италија вклучуваат ограничување на бројот на посетители, физичко растојание меѓу луѓето и носење маски, но не наметнуваат термичко скенирање, што значи дека папските базилики ќе имаат уште построги правила.

Во понеделник, исто така, се отвораат и италијанските музеи, но повторното отворање на музеите на Ватикан, кои минатата година примија седум милиони посетители, веројатно ќе биде дополнително одложено додека не се воспостават безбедносните мерки, тврди извор од Ватикан.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.