Папата Франциск ги повика вработените во медиумите на Ватикан да ја оправдаат својата работа, прашувајќи ги колку луѓе воопшто ги читаат нивните вести.

Папата ја испрати пораката за време на посетата на Канцеларијата за медиуми и односи со јавноста, што го чини Светиот Престол повеќе од сите негови амбасади низ целиот свет заедно.

Папата ја посети службата „Dicastero per la Comunicazione“ по повод 90-годишнината на Ватиканското радио и 160-годишнината од ватиканскиот весник „L’Oservatore Romano“. Соочен со голем недостаток во пензискиот фонд и предвиден дефицит во Ватикан од 50 милиони евра оваа година, Франциск нареди намалување на платите од три до 10 проценти за високи вработени во Ватикан и ја суспендираше исплатата на бонусите за стаж за две години.

Папата вети дека нема да отпушти никого за да ја надомести загубата од финансиската криза предизвикана од пандемијата. Поради кризата има огромен пад на еден од главните извори на приход на Ватикан – продажбата на билети за музеите во Ватикан.

Но, во еден вид предупредување до персоналот за комуникации во Ватикан, Папата ги почна своите ненајавени забелешки со прашањето: „Постојат многу причини за загриженост во врска со радиото, со весникот, но едно ми го допира срцето: Колку луѓе слушаат радио ? Колку луѓе читаат L’Osservatore Romano”?.

Папата изјави дека медиумите работат добро, нивните канцеларии се убави и организирани, но постои „опасност“ нивната работа да не дојде таму каде што треба. Тој ги предупреди да не стануваат жртви на „смртоносна“ функционалност – кога прават се како што треба, со цел, но тие навистина не постигнуваат ништо.

Прашањето за односот помеѓу трошоците и придобивките од медиумското работење на Ватикан е поставено многупати, бидејќи службата за комуникации троши повеќе од годишниот буџет на Светата Столица од кој било друг оддел. Според најновите податоци, „Dicastero per la Comunicazione“ има буџет од 43 милиони евра за 2021 година, што е околу 20 проценти од вкупниот износ на буџетот на Ватикан.

Неговите расходи се повисоки од вкупните расходи на десет други ватикански оддели.

Ватикан долго ги оправдуваше овие трошоци затоа што комуникациските операции се најважни за главната мисија на Светиот Престол: пренесување на католичката вера до сите делови на светот.

Шефот на таа служба, Паоло Руфини, изјави дека ги разбира зборовите на Папата како покана за креативно разгледување на иднината, иако ја признава тешката медиумска реалност денес. Тој потсети дека Франциск им рекол на вработените да „остават реалноста да им удри шлаканица“ и дека коментарот е еден вид повик да се разбудат.

Радио Ватикан го пренесуваат 1.000 радио мрежи ширум светот на различни јазици. „L’Oservatore Romano“ вели дека секој ден го читаат 21.500 читатели преку печатената и онлајн верзијата, иако тој број се искачува на 40.000 ако се разгледаат различните јазици дистрибуирани од епархиите.

„Ватикан Њуз“, главниот интернет портал на Светата Столица, има просечно 21 милион прегледи на страници месечно, но не е јасно за колку читатели станува збор.

Намалувањето на трошоците што Франциск им го наметна на сите служби предизвика револт кај вработените во Ватикан.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.