Обединетите нации соопштија дека најмалку 16 службеници на светската организација се приведени во главниот град на Етиопија, а владиниот портпарол изјави дека тие се приведени поради „учество во терор“, додека во земјата е на сила вонредна состојба.

ОН, пак, соопштија дека не се наведени причините за притворот, но етничките Тиграјци пријавија масовни апсења врз основа на етничката припадност откако етиопската влада прогласи вонредна состојба минатата недела.

Портпаролот на ОН, Стефан Дижарик истакна дека претставниците на ОН активно соработуваат со владата на Етиопија за да обезбедат итно ослободување на затворениците, чија етничка припадност не ја прецизираше, туку само кажа дека се дел од персоналот на ОН и дека се од Етиопија.

Портпаролот на владата на Етиопија, Легесе Тулу изјави дека членовите на персоналот на ОН биле приведени затоа што го прекршиле законот и поради „учество во терористички акт“, без да наведе детали.

Тоа нема никаква врска со нивната канцеларија и работа – изјави Тулу.

Етиопската влада соопшти дека приведува луѓе за кои се сомнева дека ги поддржуваат ривалските сили на Тиграј кои се борат против Владата на Етиопија изминатата година.

Етиопската комисија за човекови права објави дека стотици Тиграјци биле уапсени во Адис Абеба, меѓу кои и мајки со деца.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.