Преживеаниот од фрлената американска атомска бомба врз Хирошима, Сунао Цубои, кој стана истакнат активист за нуклеарно разоружување и оствари средба со Барак Обама во 2016 година, почина на 96-годишна возраст. Веста ја соопшти неговата група за заштита на човекови права.

Во 1945 година, кога САД го извршија првиот напад со нуклеарна бомба, Цубои, тогаш во своите рани 20-ти, бил на пат кон инженерското училиште.

Имав изгореници по целото тело. Гол, на 6 август се обидував да бегам околу три часа, но на крајот не можев веќе ни да одам – раскажуваше тој во 2016 година.

Потоа, тој зел мал камен и напишал „Овде почива Цубои“ на земјата пред да изгуби свест. Се разбудил неколку недели потоа. Подоцна во животот развил рак и други болести. Како борец за човекови права стана истакнат бранител на преживеаните од атомските бомби и цел живот водеше кампања за свет без нуклеарно оружје.

Можам да издржам тешкотии во име на човечката среќа. Можеби ќе умрам утре, но оптимист сум. Никогаш нема да се откажам. Ние сакаме нула количина нуклеарно оружје! – беше неговата порака.

„Цубои умре во саботата од анемија“, соопшти вработен во „Нихон Хиданкијо“, група која ги претставува преживеаните од атомските бомбардирања во Хирошима и Нагасаки, каде Цубои беше еден од водачите.

Според Министерството за здравство, во Јапонија сѐ уште има 127.755 преживеани лица од двата напади, со просечна возраст од 84 години.

Околу 140.000 луѓе загинаа во бомбардирањето на Хирошима, вклучително и оние кои ја преживеаја експлозијата, но починаа набргу потоа од изложеност на радијацијата. Три дена подоцна, САД фрлија плутониумска бомба врз пристанишниот град Нагасаки, при што загинаа околу 74.000 луѓе.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.