Папата Франциск во приватна миса, што се одржува секој ден и се пренесува на телевизија, истакна дека работодавците мора да ги почитуваат правата на работниците, особено на мигрантите и покрај економскиот пад предизвикан од пандемијата на новиот коронавирус.

Точно е дека кризата влијае на се, но достоинството на луѓето мора да се почитува секогаш, истакна папата Франциск и додаде дека му пристигнале многу пораки поврзани со овој пробем за 1 мај, Меѓународен ден на трудот.

Поглаварот на Римокатоличката црква застана во одбрана на сите експлоатирани работници и ги повика сите да ја претворат оваа криза во можност во која достоинството на луѓето и работата повторно ќе бидат поставени на прво место.

Папата Франциск посебно го истакна проблемот со експлоатација на земјоделските работници во Италија, меѓу кои голем број се мигранти. Во Италија, експлоатацијата на земјоделските работници неодамна доведе до низа апсења на сопственици на фарми и лица што регутираат работници за нивните потреби.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.