Генералниот директор на ирската ниско буџетска авиокомпанија „Рајанер“, Мајкл О’Лири го оцени вчерашниот инцидент во Минск како „киднапирање во организација на државата“.
Станува збор за киднапирање во организација на државата, пиратство спонзорирано од државата… Најверојатно властите сакаа да го уапсат новинарот и лицето кое беше со него – посочи О’Лири.
Тој наведе дека патниците и членовите на екипажот биле уплашени, а потврди и дека биле држени под вооружена стража и оти им бил пребаран багажот.
Белоруските власти го уапсија опозиционерот Роман Проташевич откако авионот со кој патуваше од Атина за Вилнус принудно слета во Минск, по лажна најава за поставена бомба. Тоа наиде на осуда на меѓународната заедница, која бара итно ослободување на Проташевич.
Тој е еден од основачите на Телеграм каналот НЕКСТА, што беше еден од главните извори на вести за демонстрациите во Белорусија. Проташевич од белоруските власти е обвинет за организација на масовни нереди и е означен како терорист, поради што се соочува со долгогодишна казна затвор.
Тој од 2019 година се наоѓа во егзил во Полска. Проташевич во Атина беше дел од делегацијата предводена од белоруската опозициска лидерка Светлана Тихановскаја, која неодамна присуствуваше на Делфи форумот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Comments are closed for this post.