Малта ќе започне постепено да ги олеснува ограничувањата наметнати од пандемијата ковид-19 овој месец, рече во средата малтешкиот премиер Роберт Абела, благодарение на вакцинацијата што напредува многу побрзо отколку на други места во Европската унија.

Абела пред новинарите изјави дека училиштата ќе бидат отворени во понеделник, а Владата ќе размисли за отворање ресторани и несуштински продавници на 26 април. Од 18-ти април повторно ќе се служат миси во црквите.

Училиштата и рестораните беа затворени на почетокот на март по наглиот пораст на бројот на заболени лица од т.н. британски сој.

Дневниот број на заразени на 10 март беше 510, а во последните две недели се намали на просечно 54 на ден. Досега починаа околу 400 лица, од вкупно 500.000 жители.

Абела рече дека Малта планира да го отвори туристичкиот сектор на 1 јуни.

Ќе се промовираме како една од најбезбедните туристички дестинации, рече тој.

Министерот за здравство Крис Ферн рече дека 42 проценти од населението примиле барем една доза на вакцина. Според тоа, Малта е прва во ЕУ, по што следи Унгарија со 24 проценти.

Малта користи вакцини Фајзер и Бионтек, Модерна и Астра Зенека.

Вакцинирани се околу 86 проценти од наставниците.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.