Министерството за одбрана на Литванија ја советува јавноста да избегнува купување мобилни телефони од кинески производители и да се ослободи од нив што е можно поскоро, доколку ги поседуваат.

Министерството ги советуваше граѓаните да се ослободат од мобилните телефони од кинеско производство, истакнувајќи дека владиниот извештај открил дека тие имаат вграден софтвер за цензура.

Телефоните кои се продаваат во Европа од кинескиот гигант за паметни телефони „Ксиаоми Корп“ имаат способност да детектираат и цензурираат термини како што се „Слободен Тибет“, „Да живее независноста на Тајван“ или „Движење за демократија“ – соопшти литванската Агенција за кибер безбедност.

Во извештајот на литванската Влада се наведува дека софтверот на телефонот „Mi 10T 5G“ на „Ксиаоми“ е исклучен за регионот на Европската Унија, но може да се вклучи од далечина во секое време. Исто така, се наведува дека телефоните на „Ксиаоми“ испраќаат шифрирани податоци за користењето на уредот до сервер во Сингапур. Извештајот открива дека листата на термини кои можат да ги цензурираат системските апликации, вклучувајќи го и стандардниот интернет прелистувач на „Ксиаоми“, во моментов содржи 449 изрази на кинески и постојано се ажурира.

Во извештајот се наведува дека тоа е важно не само за Литванија, туку и за сите земји кои користат опрема на „Ксиаоми“.

Наш совет е да не купувате нови кинески телефони и што побрзо да се ослободите од веќе купените – изјави литванскиот заменик министер за одбрана Маргирис Абукевичиус.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.