Откако ја блокираше експлоатацијата на ураниум, новата Влада на Гренланд објави забрана за истражување на нафта на таа територија на Арктикот.

Во одлуката се наведува дека „е одлучено да се прекине сегашната стратегија за нафта и да се запре понатамошното истражување за нафта на Гренланд“.

Ова е логичен чекор, бидејќи Владата сериозно ја сфаќа климатската криза. Одлуката е донесена и во интерес на нашата природа, во интерес на нашиот риболов и со цел да се концентрира нашата економија на реални потенцијали – изјави членот на Владата, Наја Натаниелсен.

Истражувањата на нафта во Гренланд беа во застој во изминатите неколку години, така што оваа одлука е во голема мера симболична. Според локалната власт, „новата економска анализа за профитабилноста при истражувањето на нафта (на Гренланд) јасно покажува дека профитабилноста е мала“, односно двојно помалку од она што го очекуваат нафтените компании.

На изборите во април, на власт дојде левичарската партија за заштита на животната средина. Во согласност со предизборните ветувања, Владата во моментов одржува консултации со цел да донесе закон за забрана за истражување и експлоатација на ураниум на Гренланд.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.