Италијанската агенција за регулирање на приватноста на податоците вчера ѝ нареди на апликацијата „ТикТок“ да ги блокира сметките на сите корисници во Италија чија возраст не може да се потврди, по смртта на 10-годишно девојче во Палермо, Сицилија, кое ја користело кинеската апликација.

Нејзините родители изјавија дека таа учествувала во таканаречениот „предизвик за гушење“ на „ТикТок“, ставајќи ремен околу вратот и држејќи го здивот додека снимала со нејзиниот мобилен телефон.

„’ТикТок’ беше нејзиниот свет. И ‘Јутјуб’. Така го поминуваше времето“, изјави таткото на девојчето Анџело Сикомеро за весникот „Кориере дела сера“.

Девојчето било хоспитализирано на интензивна нега, каде пристигнало со срцев застој. Девојчето починало вчера, по длабока и неповратна кома предизвикана од недостаток на кислород во мозокот.

Обвинителството отвори истрага за можно поттикнување на самоубиство и истражува дали некој го поканил девојчето да учествува во предизвикот.

Во соопштението регулаторот наведува дека иако „ТикТок“ се обврза да забрани регистрација за деца под 13-годишна возраст, сепак, е лесно да се заобиколи правилото.

Портпаролот на „ТикТок“ во Италија одговори дека приватноста и безбедноста се апсолутни приоритети, истакнувајќи дека тие постојано работат на заштита на нивните политики, процеси и технологии за да ја заштитат заедницата и особено помладите корисници.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.