Преговарачот на Европската унија за Брегзит Мишел Барние изјави денеска дека се уште постои ризик од хаотично заминување на Велика Британија од европскиот блок без договор и дека идните трговски разговори ќе бидат „тешки”.

Се уште постои ризикот од тоа Брегзит да се случи без ратификуван договор. Се уште треба да се подготвуваме – рече Барние во Брисел.

Барние наведе дека „во сите земји-членки постои голема разлика во подготвеноста помеѓу поголемите компании и малите и средните претпријатија” и додаде дека не е време да се биде самозадоволен, туку е потребно да се работи со мали и средни претпријатија.

Тој рече дека излегувањето од ЕУ без договор може да се случи кон крајот на јануари, доколку британскиот Парламент не го ратификува договорот на премиерот Борис Џонсон и Лондон не добие уште едно одложување за излез од ЕУ.

Барние предупреди дека има малку време помеѓу Брегзит и крајот на 2020 година за да се постигне нов трговски договор.

Ќе бидат тешки преговори – рече Барние, додавајќи дека времето што е на располагање за постигнување нов трговски договор ќе биде исклучително кратко, 11 месеци.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.