Советот на судии во Апелациониот суд Скопје ја уважи жалбата поднесена од страна на јавниот обвинител од Основното јавно обвинителство за гонење на организиран криминал и корупција во врска со изречената пресуда во предметот со штитеничката на Домот за деца „Ранка Милановиќ“ – Скопје.

Станува збор за 12-годишно девојче кое било сексуално експлоатирано. Сега осудената Мајмире Дестанова ја продавала по градови, во кафани и на таксисти и се заканувала и ја тепала, а организирала и присилен брак за девојчето.

Имено, во декември минатата година надлежниот јавен обвинител поднесе жалба, незадоволен од висината на изречената казна за кривично дело – Трговија со дете со која тројцата обвинети, по признание на вина, беа осудени на казна затвор и тоа Дестанова во траење од 13 години, а Ерол Јашаров и Сезар Раимов, кои сексуално го злоставувале и малтретирале девојчето, добија по 12 години.

Апелациониот суд Скопје, уважувајќи ја жалбата на обвинителството, ја преиначи првостепената пресуда на Основниот суд Скопје 1 Скопје и на првообвинетата и изрече казна затвор во траење од 17 години, а другите две лица ги осуди на казна затвор во траење од по 14 години.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.