Гинеколозите од Битола, кои дозволиле невработено лице да изврши породување со царски рез, добија кривични пријави

Битолската полиција поднела кривични пријави за доктори од Битола, кои на почетокот на годината на невработена докторка-гинеколог и дозволиле да изврши оперативна интервенција, односно породување со царски рез врз родилка во Одделение за гинекологија и акушерство при битолската болница.

СВР Битола денеска до битолското ОЈО поднесе кривична пријава против: М. В. (33) од Битола, поради постоење на сомнение за сторено кривично дело „злоупотреба на службената положба и овластување“ и „фалсификување службена исправа“ и Г.Ч. (60) од Битола поради постоење на сомнение за сторено кривично дело „злоупотреба на службената положба и овластување“ – информираат од МВР.

Кривична пријава е поднесена и против А. В (33) од Белград, сопруга на првопријавениот, заради постоење на основи на сомнение за сторено кривично дело „надрилекарство“ и кривично дело „непостапување според здравствените прописи за време на епидемија“.

Првопријавениот и второпријавениот како доктори гинеколози во ЈЗУ Клиничка болница-Битола пречекорувајќи ги своите посебни овластувања во вршење на должноста и овозможиле на третопријавената на 1 јануари 2021 година без соодветна лиценца за работа издадена од Лекарска комора на РСМ, да даде медицинска помош – изврши оперативна интервенција, породување со царски рез во ЈЗУ Клиничка болница Битола – операциска сала на Одделение за гинекологија и акушерство врз родилка – информираат од МВР.

Оттаму додаваат дека по завршувањето на интервенцијата, првопријавениот во оперативниот дневник внел невистинит податок, односно во графата податоци за оператор, ги внел своите податоци и податоците на второпријавениот, а од стариот оперативен дневник отстранил страници на кои третопријавената ги запишала извршените оперативни интервенции на 1 јануари 2021 година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.