Македонската ракометна легенда, Кирил Лазаров од оваа година доби двојна улога во репрезентацијата, па покрај капитенската „лента“ тој е и селектор. Сепак, досега играчот на Нант не ги поседуваше сите потребни документи и лиценци, сè до денес.

Од денес, Лазаров е сопственик на највисока тренерска диплома издадена од ЕХФ или „Мастер-коуч“ диплома. Новиот селектор на Македонија го положи тестот даден од европската ракометна куќа, анализирајќи ја темата: „Репрезентација на Шпанија на Европското првенство во Австрија, Шведска и Норвешка 2020 година – освојувач на златен медал (структура на тимот, применета стратегија и оцена на играчи)”.

Лазаров со овој сертификат и титула „мастер-коуч“ влезе во одбрана група македонски тренери со највисокото ниво на лиценца издадено од ЕХФ. Најдобриот ракометар во историјата на земјава веќе ја започна својата авантура во новата улога, со Македонија на дебито го совлада светскиот првак Данска, а обезбеди и место на следното Европско првенство во Словачка и Унгарија. Исто така, ја водеше и кадетската селекција до финалето на ЕХФ шампионатот во Скопје.

Низ својата богата играчка кариера, Лазаров имаше шанса да учи од многу големи тренерски магови како: Јевремовиќ, Дујшебаев, Пасквал, Червар, Раул Гонзалез…



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.