Македонските екипи ТФТ и Куманово, денес стартуваат во квалификациите за кошаркарскиот Еврокупот во организација на ФИБА. ТФТ од 14:30 часот игра со Седеак, пет часа подоцна, во четвртфиналето, Куманово се среќава со Гмунден.

Скопскиот клуб поради големата временска разлика со Краснојарск каде се игра квалификацискиот турнир, натпреварот ќе го почне порано од вообичаените термини. Нивен прв противник е унгарскиот претставник Седеак од Сегедин, третопласираната екипа од минатата сезона во домашното првенство и по основниот дел и во плеј-офот.

– Се наоѓаме во мошне тешка група, можеби најтешка во квалификациите, со тимови од најдобрите европски лиги како домаќинот Енисеј, потоа Хапоел Хаифа и Бајројт кој ни е можен ривал во полуфиналето. Нашата шанса ја гледаме во првиот меч, против Сегдеак, квалитетен тим со одлична бековска линија, предводена од Парсонс и Кук. Ривалот е добро скаутиран и се надеваме на победа и пласман во полуфиналето. Очекуваме да одиграме барем два натпревара во Краснојарск, но одиме без никаков притисок. Основна цел ни е да ‘купиме’ ново искуство од натпреварите на европска сцена, нешто што сум сигурен дека позитивно ќе влијае на натамошниот дел од сезоната, изјави тренерот Боро Смилковски пред европското деби.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.