Перфектно одиграна акција на само 0,9 секунди до крајот на мечот резултира со забивање на Деандре Ејтон и победа на Феникс санс против ЛА Клиперс со 104:103. Со овој триумф, „сонцата“ поведоа со 2:0 во победи во финалето на Западната конференција во НБА лигата.

При водство на Клиперси од 103:102 и помалку од една секунда до крајот, Џеј Краудер изведе од зад кошот. Девин Букер направи одличен блок врз Ивица Зубац, со што му овозможи на Ејтон да се втурне кон кошот, во скок да го дочека совршено изведеното додавање од Краудер и да ја забие топката низ обрачот. Со тоа го постави конечниот резултат и донесе расплет на лудиот финиш на средбата.

Пред тој момент, односно во последните 1,5 минути до крајот имаше неколку ситуации во кои судиите гледаа повторени снимки за да оценат кому треба да му припадне топката откако таа излегуваше од теренот, имаше неколку промени на водството, а ѕвездата на Клиперси, Пол Џорџ, утна и две слободни фрлања на 8,3 секунди до крајот, при водство на неговата екипа од 103:102.

Најефикасен кај Феникс беше Камерон пејн со 29 поени, Ејтон имаше дабл-дабл од 24 поени и 14 скокови, додека Девин Букер мечот го заврши со 20. Предводник на Клиперси беше Џорџ со 26 поени, додека Реџи Џексон постигна 19 поени.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.