Генералниот секретар на Европската фудбалска федерација (УЕФА), Теодорос Теодоридис, предупреди дека Реал Мадрид, Барселона и Јувентус може да бидат исклучени од Лигата на шампионите, бидејќи клубовите се основачи на Суперлигата.

Можно е. Ако клубовите не ги почитуваат правилата, тие можат да бидат исфрлени. Сè зависи од нив. Сите други клубови ги следеа правилата. Ова нема да биде лична одлука на претседателот на УЕФА или извршниот комитет на организацијата. Имаме јасна поделба на силите, Извршниот комитет и Управата на УЕФА не можат да влијаат врз работата на судството.

 

Овие три клуба се едни од најдобрите во светот. Сепак, за УЕФА, сите клубови се еднакви и ние браниме вредности како што се почит и еднаквост. Доколку клубовите ги прекршат правилата, тогаш тие мора да се соочат со последиците што треба да ги утврдат независни тела. Доколку клубовите не се согласуваат со одлуката на независните дисциплински органи, тие можат да поднесат жалба до Арбитражниот суд за спорт (ЦАС) – изјави Теодоридис за шпанска  „Марка“.

Во април, 12 врвни европски клуба – Манчестер јунајтед, Ливерпул, Манчестер сити, Арсенал, Челзи, Тотенхем, Барселона, Реал Мадрид, Атлетико, Интер, Милан и Јувентус најавија создавање на Суперлигата. За неколку дена сите клубови освен Реал Мадрид, Барселона и Јувентус најавија повлекување од Лигата.

На 25 мај, УЕФА отвори дисциплинска постапка против овие три клубови и објави дека на трите екипи кои не се повлекоа од Суперлигата може да им биде забрането учество во европските натпреварувања.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.