Институтот за јавно здравје во соработка со НВО „Здрава иднина”, а со поддршка од Министерството за здравство денеска во Градскиот парк во Скопје организира одбележување на 29 септември, Светски ден на срцето под мотото „Биди херој на срцето, дај ветување“.

Целта е, како што информираат од Институтот, да потсетат на значајноста на здравиот стил на живот и редовните превентивни прегледи за навремено откривање на болестите на срцето и спречување на прераната смрт.

На присутните граѓани ќе им се мери шеќер и холестерол во крвта, крвен притисок, ќе им се одредува индексот на телесната маса преку мерење на телесната висина и тежина, ќе им се даваат стручни совети во врска со нивната здравствена состојба и ќе им се делат флаери и друг вид здравствено-едукативен материјал од страна на здравствени работници.

Во рамки на програмата ќе се презентираат јога вежби и вежби за рекреација. На настанот ќе присуствуваат претставници од Министерството за здравство, Фондот за здравствено осигурување, од велосипедски друштва, здруженија на граѓани, пензионери.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.