Министерот за здравство Венко Филипче, во изјава за Канал 5 телевизија во однос на почетокот на учебната година, отворањето на градинките, како и враќањето на работа на родителите истакна дека планот и стратегијата на Комисијата за заразни болести е да не се сконцентрираат повеќе ризик фактори во ист временски период.

Свесни сме дека на почетокот на септември луѓето се враќаат од годишните одмори и почнуваат да работат на работните места – што е еден ризик фактор затоа што е веќе една одредена голема бројка на луѓе во затворена просторија. Се отвораат градинките, се прекина породилното отсуство заради тоа што градинките се отворени и бебињата, малите деца има каде да се згрижат. Комисијата заедно со претставници на Министерството за труд и социјална политика интензивно работеше и направија соодветни протоколи за функционирање на градинките – колку деца да има во групите, како да се запазуваат превентивните мерки. Се намали бројот на деца во групите, се преполови. Има алгоритам како да се постапи во случај ако некое дете појави симптоми за време на престојот во градинката. И во таа смисла, отворањето на училиштата и тоа само со една ограничена бројка на деца, од прво до трето одделение, заради тоа што и тоа е потенцијален ризик фактор гледајќи ги искуствата од други земји. Оние земји кои нагло ги отворија училиштата и сите деца беа во училиште и беа приморани делумно или целосно да ги затворат. Проценувајќи како ќе се одвива епидемијата во месец септември, ние дозволуваме да се отворат училиштата на почетокот на октомври, но само деца со физичко присуство од прво до трето одделение. Понатаму, ако остане се стабилно и мирно, од ноември/декември и други одделенија ќе може да се враќаат со физичко присуство. А до тогаш да следат онлајн настава – потенцираше министерот Филипче.

Во однос на реакцијата на родителите, Филипче посочи дека треба да се вратиме на работните места, заради тоа што тоа се случува насекаде во светот.

Ние ќе живееме со вирусот веројатно и цела следна 2021 година. Мора да се научиме да ги почитуваме превентивните мерки, протоколите коишто ги има за апсолутно сите економски оператори, угостителски објекти, компании, фабрики, училишта, градинки итн. Едноставно тоа ќе биде нашиот живот – рече Филипче.

Министерот Филипче истакна дека сите настани коишто ќе се одвиваат во есенскиот и зимскиот период и на коишто ќе има поголем број на луѓе во затворена просторија, капацитетот не смее да биде пополнет повеќе од 30%, а на отворено повеќе од 50%.

Настаните треба да бидат со седење, заради тоа што секогаш кога имаше настани на коишто луѓето стоеја мерките тешко се почитуваа. И секако останатите принципи на дезинфекција, мерење на температура, одржување на дистанцата. На тој начин ние практично ги враќаме во функција нормална сите коишто до сега не функционираа, тука мислам на економски оператори, компании итн. Очигледно е дека е вирусот е тука ние мора да научиме да живееме со вирусот, меѓутоа почитувајќи ги овие мерки – рече министерот Филипче.

Министерот Филипче изјави дека единствен начин да се заштитиме себеси, најблиските околу нас и кругот на луѓето, на работното место е преку почитување на превентивните мерки.

Секојдневно имаме нови сознанија за вирусот, нешто ново се открива од анализите, студиите. Меѓутоа принципите за превенција се истите. Да се носи маска, да се одржува дистанца и често да се дезифицираат и мијат рацете. Навистина е поразително што огромен број на граѓани тоа не го почитуваат. Секојдневно гледаме и големи собири,места каде што луѓето не носат маска, не одржуваат дистанца. Мораме да сме свесни дека го штитиме и нашето здравје, меѓутоа и здравјето на навистина ранливите групи на грѓани, кои што се насекаде околу нас – рече Филипче.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.