„8 Септември“ пред финансиски колапс, персоналот на Инфективна се десеткува, „Козле“ се полни со мајки и деца заболени од корона вирусот. Во една реченица вториот бран од коронакризата ќе не фати уште понеподготвени од првиот.
Непочитување и деградирање на звањето медицинска сестра е една од причините поради кои медицински сестри од Клиниката за инфективни болести го напуштаат јавното здравство. Во рок од една недела во архивата на Инфективната клиника пристигнати се три барања за раскинување на работниот однос. Отказите пристигнуваат пред почетокот на есенскиот бран од пандемијата, но исто така, во момент кога министерот за здравство Венко Филипче не убедува дека ситуацијата е под контрола.
Нејасно е како Филипче успева да го одржи привидот на контрола пред своите очи, зашто спроти министерот никој не гледа контрола. Дека работите не се под контрола, а медицинскиот персонал е на залезот на силите потврдуваат и овие откази.
Од ВМРО-ДПМНЕ реагираат дека во Македонија неколку дена по ред стапката на заразени во однос на бројот на тестирани е над 10% и дека состојбата станува алармантна.
Бројот на вкупно заболени од корона вирус надмина 17.600 заболени лица и достигна до речиси 730 починати, што е далеку повеќе од прогнозите на министерот. Македонија во пресрет на вториот бран од епидемијата има рекордни бројки на заболени и починати. Дополнително главниот Ковид центар во државата, болницата „8 Септември“ е пред финансиски колапс и нема доволно средства за набавка на материјали и нормално работење, а останатите болници секој ден се полнат со се повеќе заболени.
Во болницата Козле бележат зголемен број на заболени деца и мајки од вирусот, а исто така се бележат секој ден нови бројки на заразени деца во градинките во Скопје и Македонија. Епидемијата се шири без контрола. На целата ваква состојба од министерството одговараат со мал број на тестови кои и покрај бројот покажуваат дека огромен број од тестираните се заразени од вирусот.
Тоа значи дека министерот за здравство станува се повеќе министер за ширење на зарази и епидемии, кој без јасен план и мерки не воведува во нов ризичен период – велат од ВМРО-ДПМНЕ.
Дека медицински кадар си заминува потврдува и доктор Лазаров кој остава надлежните да ги кажат причините.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Comments are closed for this post.