Пазарната вредност на компанијата „Тесла“ надмина трилион долари, откако ја доби најголемата нарачка на возила досега од компанијата за изнајмување автомобили „Херц“.

Акциите на „Тесла“ пораснаа за 14,9 отсто, а вредноста на компанијата достигна 1,045 трилиони долари, со што таа стана највредниот производител на автомобили во светот. „Тесла“ е и првата автомобилска фирма која се приклучи на елитниот клуб на компании со вредност од трилион долари и повеќе, каде што се „Епл“, „Амазон“, „Микрософт“ и „Алфабет“.

За „Тесла“ и нејзините инвеститори, одлуката на „Херц“ да нарача 100.000 „Тесла“ автомобили покажува дека електричните возила повеќе не се ексклузивен производ, туку ќе доминираат на масовниот пазар на автомобили во блиска иднина.

Електричните возила сега се во широка употреба и ние сме само сведоци на почетокот на глобалната побарувачка и интерес – изјави извршниот директор на „Херц“, Марк Филдс.

Извршниот директор на „Тесла“, Илон Маск постави стапка на раст на продажбата од 50 насто годишно, која во одреден миг би требало да достигне 20 милиони продадени возила за една година. Тоа е двојно повеќе од продажбата на актуелните лидери на пазарот „Фолксваген“ и „Тојота“.

Побарувачката за електрични возила на некои пазари веќе ги надмина очекувањата, па „Моделот 3“ на „Тесла“ е најпродаваниот автомобил во Европа за минатиот месец, објави во понеделникот консултантската компанија „ЈАТО дајнамикс“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.