Пандемијата предизвикана од ковид-19 влијае на сите аспекти од животот, па карантинот во Италија го зголеми и бројот на оние што чекаат за развод до толкава мера што не можат да го решат тоа со редовна постапка пред судија, па некои судови се одлучија на развод преку интернет.

Судовите се преполни со барања за развод, па некои италијански градови како што се Торино, Верчели, Верона, Монца, одлучија да донесат пресуда за развод и да ја испратат до заинтересираните страни по електронска пошта. И така, барем за сега, во вонредна ситуација, озаконет е и онлајн развод.

Во Италија, според податоците на Институтот за статистика, годишно се разведуваат околу 350 илјади луѓе, а за конечна одлука, дури и во нормални околности се чека долго. Откако во 2015 година во Италија е донесен закон за „брз развод“, ситуацијата е подобрена. По донесувањето на законот за брз развод, нагло се зголеми бројот на барања за развод, од 50 илјади на 80 илјади, а во последните години на 90 илјади барања за развод годишно.

Сè уште нема податоци за тоа колку ќе влијае карантинот на бројот на разводи. Весникот Avvenire наведува дека новата мерка може да поттикне многумина побрзо да се одлучат на тој чекор, а се спомнуваат и некои судови кои веќе заговараат онлајн разводот да продолжи и по пандемијата со коронавирусот.

Законот за развод во Италија беше донесен во 1970 година и покрај противењето на тогашните моќни христијански демократи. Дури и денес, потребно е околу една година за две лица конечно да се разведат, а процесот чини од 800 до 2.000 евра по човек.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.