Денеска е 1 април, Светскиот ден на шегата, кога многумина се трудат со својата досетливост да ги измамат и да ги насмеат другите.

Овој ден се обележува со векови, но неговото потекло е нејасно. Постојат различни толкувања, а едно од нив е дека овој своевиден „народен празник“ се појавил кон крајот на Средниот век во Европа и претставувал општонародна веселба.

Во Англија се смета дека е преземен од Истокот и 1 април го нарекуваат Ден на сите глупаци.

Во Финска го поврзуваат со пролетното подучување на децата за земјоделските работи, а слично е и во Швајцарија.

Постојат мислења дека корените на овој „празник“ се во Стариот Рим, кој бил познат и по тоа што неговите граѓани знаеле добро да се забавуваат смислувајќи различни шеги.

Други сметаат дека тој обичај се појавил во 16 век во Франција, околу 1564 година, а за оној кој бил „насамарен“ имале обичај да кажат дека добил „априлска риба“.

Германците го сметаат 1 април за ден кога се ранливи и овој ден го поврзуваат со денот кога се родил предавникот на Христос, Јуда.

Во некои земји, како и во Македонија, постои традиција луѓето да се маскираат за први април.

Годинава, како и претходната, поради корона вирусот улиците нема да бидат преплавени со деца и луѓе кои маскирани ќе шетаат по улиците, нема да има организирани настани.

Сепак, тоа не е причина во домашна атмосфера да не уживате во Денот на шегата и да насмеете некого.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.