Бугарската вицепремиерка и министерка за надворешни работи, Екатерина Захариева, е во самоизолација, откако заменикот министер Петко Дојков даде позитивен резултат за ковид-19 на брз тест во рамки на рутинската проверка на раководниот состав на МНР. Од Министерството соопштуваат дека се чекаат резултатите од неговиот PCR тест.

Захариева нема здравствени потешкотии, добро се чувствува и продолжува да ги извршува своите работни задачи. Иако брзиот тест не е основа за карантин, вицепремиерката одлучила да биде во самоизолација.

Бидејќи Дојков учествуваше на тристраните разговори во Берлин како дел од бугарската делегација, Министерството по дипломатски пат ги известило и делегациите на Македонија и на Германија.

Во карантин се ставени сите членови на бугарската делегација, која престојуваше во Берлин.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.