Претседателот на Владата на Република Македонија Зоран Заев вчера остварил средба со амбасадорката на Соединетите Американски Држави во нашата земја Кејт Брнз, на која разговарале за неодамна усвоениот владин План за борба против корупцијата.

Како што соопшти владината прес-служба, во таа насока премиерот Заев истакнал дека Владата е целосно посветена на неговото спроведување како системски организиран процес за зајакнување на капацитетите и за синхронизирање на активностите на институциите за бескомпромисна борба против корупцијата, непотизмот, судирот на интереси и злоупотреби на позициите, а амбасадорката ги поздрави ваквите напори.

Премиерот Заев и амбасадорката Брнз, се наведува, разговарале и за реформите предвидени со „Агенда: Европа дома“, во која, освен утврдените чекори за борба против корупцијата, се вклучени и мерки за  обезбедување европски стандарди за изборните реформи, за правосудството, темелните човекови права, реформите во медиумската сфера, економско владеење, реформа на јавната администрација, како и за реформите во областа на животната средина и климатските промени.

Со посебно внимание премиерот Заев и амбасадорката Брнз се задржале на можностите за унапредување на економската соработка и за пројавениот интерес на некои компании од САД да инвестираат во Македонија, стои во соопштението.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.