Градоначалниците од СДСМ да не глумат локални шерифи и да им служат на граѓаните достоинствено, рече премиерот Зоран Заев одговарајќи на новинарско прашање за градоначалникот на општина Лозово, Ацо Велковски, за кого деновиве беше објавено дека повеќе вработени во општината се жалат на мобинг од страна на општинската управа, а кој веќе имаше слични обвиненија и во минатото.

Мојата порака е таа што секогаш ја давам за градоначалниците од СДСМ кои победија на изборите – да не глумат локални шерифи и да им служат на граѓаните достоинствено. Лично разговарав со него и секако добив соодветно објаснување и корекции за одредени работи. Јас сум служител на сите граѓани и сакам да бидам секогаш во нивна заштита. Оваа недела сигурно ќе реагирам зашто јас сум служител на сите наши граѓани и сакам да бидам секогаш во нивна заштита. Секако, граѓанин е и градоначалникот, но тој извршува сериозна и одговорна функција. Не знам детали, не можам да инсинуирам било што, но дефинитивно ќе се информирам за случајот и ќе дадам дополнително коментар, изјави Заев.

Сител вчера објави дека четворица членови на Дисциплинската комисија се мета на раководството на општината и против нив се поднесени дисциплински постапки. Претходно, телевизијата неколку пати објавуваше случаи со мобинг врз вработените.

Инаку, во општина Лозово вработени се 12 службеници, а за три години се соочиле со речиси 30 дисциплински постапки.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.