Беса синоќа со зурли и тапани го прослави влегувањето во вториот круг на нивниот кандидат и претседател на партијата Биљал Касами во вториот круг од локалните избори за градоначалник на Тетово.

Во вториот круг влезе и Теута Арифи, актуечна градоначалничка од ДУИ, а на трето место заврши Вулнет Мурсели, кандидатот на коалицијата Алијанса за Албанците и Алтернатива.

Од пребројани 96,58% гласови, Касами е во блага предност пред Арифи со 10.150 гласа наспроти 10.732.

Приврзаниците и симпатизери на движењето Беса синоќа излегоа на градскиот плоштад во Тетово и го прославија влегувањето на лидерот Билал Касами во вториот круг за избор на градоначалник на Тетово.

„Тетово за првпат ќе има градоначалник кој ќе се грижи за сите граѓани, без разлика на политичката, етничката или друга определба. Очекуваме во вториот круг од гласањето сите граѓани да застанат позади мене, зошто им ветувам дека за четири години Тетово ќе биде град во кој ќе бидеме горди што живееме, град во кој еднаш за секогаш ќе ги затвориме темите како што е водата, како што е чистотата, како што се кучињата скитници. За четири години, кој ќе сака да се кандидира за градоначалник на Тетово ќе зборува за култура, за образование, за наука, спорт, за живот на младите, ќе зборува за иднината, а не за минатиот век на што, за жал, не принуди да зборуваме актуелната градоначалничка. Според нашите информации ние водиме на гласањето, многу е тесно водството, но сепак водиме“, рече Касами.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.