Во прилеп има се полоша состојба со корона вирусот, и особено со британската мутација. Од средината на минатиот месец има значителен пораст на новозаболени, а од ЦЈЗ Прилеп очекуваат дека тој тренд ќе продолжи и во наредните месеци, пишува „Фокус“.

Од почетокот на оваа година регистрирани се вкупно 1. 782 случаи, од кои повеќе од половината (1.083 или 55%) се во последните 3 недели. Во моментов активни се 733 случаи. Брзото ширење на вирусот меѓу другото можеме да го препишеме на присуството на Британскиот сој. Британскиот сој на вирусот во Прилеп беше докажан кај пациенти заболени во месец јануари, што укажува дека вирусот кај нас циркулирал и претходно, но од кога точно не можеме да кажеме, бидејќи сите потврдени случаи се автохтони, не патувале надвор од земјата и немале контакт со лица дојдени од друга земја. Значи, знаеме дека вирусот е присутен, но не знаеме во колкав процент. Од она што го имаме како ситуација можеме да заклучиме само дека е поприсутен одколку што е потврдено официјално – велат за „Фокус“ од Центарот за јавно здравје – Прилеп.

Како што додаваат оттаму, другата причина за забрзаното ширење на заразата, се и кафеанските дружби и семејните прослави, каде не се почитуваат никакви мерки и не се носат маски.

Не можеме да следиме кој од кого и каде се заразил, бидејќи истовремено симптоми се јавуваат кај повеќе членови на семејство или учесници на некој настан. Во моментов најважно е заболените да се изолираат, исто така и нивните контакти, со цел да се намали трансмисијата на вирусот – додаваат од ЦЈЗ Прилеп.

Од почетокот на пандемијата во Прилеп регистрирани се вкупно 5.858 заболени и 278 починати лица. Меѓу заболените во последниот епидемиски бран има се повеќе помлади лица, а меѓу починатите доминираат постарите возрасти- над 60 години.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.