ВМРО-ДПМНЕ е подготвено да разговара за експертска влада доколку ја предводи човек којшто би бил заеднички прифатлив, натпартиска личност што може да ја води државата напред до локалните избори, а потоа да се организираат предвремени парламентарни и локални избори, соопшти денеска опозициската партија откако премиерот Зоран Заев го прифати предлогот на опозицискиот лидер.

Ова го посочуваат од ВМРО-ДПМНЕ во партиска реакција на изјава на Стефан Васев од СДСМ, а по изнесениот став на  премиерот Зоран Заев дека сака да отвори дебата за заедничка власт на Владата со опозицијата.-

Очигледно е дека Васев не е запознаен со последната изјава на неговиот шеф. Го советуваме Васев да прочита по медиумите што неговиот шеф Зоран Заев бара. Заев денес со неговата изјава за широка влада потврди дека на Македонија и е потребна нова и поинаква Влада. Заев денеска потврди дека неговата влада и мнозинството се неефикасни и немаат капацитет да се носат со проблемите. Заев не е способен да ја менаџира Република Македонија. Наместо Васев да дава празни изјави и да обвинува, нека погледне во неговата партија што се случува, а потоа да говори, се вели во реакцијата од ВМРО-ДПМНЕ.

Васев во изјава денеска истакна дека со месеци Христијан Мицкоски и неколку негови соработници, ја лажеле јавноста дека има ново парламентарно мнозинство, дека Владата предводена од СДСМ само што не паднала.

Со месеци Мицкоски живееше во фатаморгана дека станува премиер. Заради лични калкулации во белиот дворец, Мицкоски и неговите поддржувачи со месеци ги блокираат важните процеси за иднината на државата. На крајот, се потврди дека сите лаги, сите блокади и опструкции се со една цел – спас на фотелјата на Мицкоски во белиот дворец, рече меѓу другото Васев.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.