Пратеничката група на ВМРО-ДПМНЕ до Собранието достави барање за спроведување на надзорна расправа за утврдување на причините и извршувањето на законите во постапката за доведување до стечај на Еуростандард банка.

Како што истакна пратеникот од ВМРО-ДПМНЕ Зоранчо Јованчев, иницијативата е поддржана од целата опозиција од ВМРО-ДПМНЕ, Коалицијата Алијанса за Албанците – Алтернатива и Левица.

Тврдењата на ВМРО-ДПМНЕ дека банката свесно е доведена во стечај со одлевање на големи суми на пари преку кредити без покритие за финансирање на фирми од Струмица блиски до семејството Заеви ги потврди и сопственикот на Еуростандард банката, кој јавно објави и дел од фирмите каде според него завршувале парите од Еуростандард банка, а кои фирми немале покритие за кредитите, односно биле банкротирани. Ова е криминал од 200 милиони евра, каде оштетени се 100.000 граѓани. Овој криминал кој води до Струмица не смее да остане не расчистен. За таа цел ВМРО-ДПМНЕ бара надзорна расправа, на која ќе бидат повикани сите релевантни чинители, како гувернерката на НБРМ, сопственикот на банката, оштетените штедачи, Финансиската полиција, Управата за финансиско разузнавање и ЈО. Мора да има одговорност за секој оној кој го довел во опасност финансискиот пазар на Република Македонија и имотот на граѓаните – вели Јованчев.

Тој додава дека недозволиво е затоа што некој испумпувал пари или правел сомнителни трансакции, сега да трпат 20.000 пензионери од руралните делови на државата кои се уште немаат подигнато пензија, затоа што досега примале пензија преку пошта.

Јованчев прашува дали некој се запрашал како живеат, односно како преживуваат тие луѓе, кои се нечии мајки, татковци, баби и дедо и за кои државата мора да покаже грижа.

Не може заради желбата за богатење на неколкумина над 2.000 фирми сега да не можат да дојдат до своите пари, од кои на поголем број од нив тоа можеби им биле и единствените ликвидни средства за работа. Исто така одговорност мора да има и затоа што 780 луѓе кои имаат повеќе од 30 илјади евра во банката сега не можат да си ги земат своите пари, односно им пропаднале. Тоа можеби е нивната животна заштеда, пари за стан, куќа итн. Тоа се 780 човечки животи, 780 семејства, чија иднина е уништена. Одговорност мора да има, а најдобар пат за тоа да се случи е да се откријат фактите. Токму тоа е целта преку оваа Надзорна расправа која ја бараме и која мора да се случи, доколку сакаме правниот систем да функционира и инвеститорите од страна да не гледаат како стабилен пазар со јасни правила и прописи. Се друго ќе значи нарушување на довербата во системот и пазарот на капитал и ќе ги одвраќа инвеститорите од нашата земја – вели Јованчев.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.