Вицепремиерот за економски прашања Фатмир Битиќи сè уште не поднел Анкетен лист за својата и имотната состојба на најблиските иако според Законот за спречување на корупција анкетен лист треба да се поднесе во рок од 30 дена по изборот/именувањето на функцијата.

Заменик-претседателот на Владата, кој доаѓа од СДСМ, на оваа функција е избран на 30 август. Битиќи не поднел ниту изјава за интереси во која треба да наведе колку и какви бизниси поседува, дали и колку има свои блиски што се вработени во јавниот сектор, дали има судир на интереси и слично.

„Избран или именуван функционер, одговорно лице во јавно претпријатие, јавна установа или друго правно лице кое располага со државен капитал, при изборот или именувањето, а најдоцна во рок од 30 дена од денот на изборот или именувањето, пополнува анкетен лист со детален попис на недвижен имот, подвижни предмети од поголема вредност, хартии од вредност и побарувања и долгови, како и друг имот што е во негова сопственост, или сопственост на членовите на неговото семејство, со наведување на основот на стекнување на пријавениот имот и депонира заверена изјава од нотар за откажување од заштита на банкарска тајна во однос на сите сметки во домашни и странски банки“, стои во Законот за спречување на корупција.

Битиќи пред два месеци за прв пат е избран како државен функционер, а претходно извршуваше само партиска функција во СДСМ како претседател на Комисијата за финансии, а беше и советник за економија во Кабинетот на премиерот Зоран Заев.

Премиерот Заев за Битиќи рече дека во Владата доаѓа од бизнисот, како поранешен извршен директор на Стопанската комора на Северозападна Македонија.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.