Претседателот на Советот на ЕУ Доналд Туск денеска пред пратениците во Европскиот парламент повтори дека европските лидери минатата недела направија „голема грешка што не донесоа одлука за почеток на пристапните преговори со Македонија и Албанија“.

Европските лидери имаа тешка дебата околу проширувањето. По јасната препорака од Европската комисија, огромното мнозинство од земјите членки сакаа да бидат отворени пристапните преговори со Македонија и Албанија, но и покрај тоа не беше постигнат потребниот консензус. Според мое мислење, тоа беше грешка и тоа отворено и директно им го кажав на лидерите. Сега се надевам дека лидерите ќе го исполнат заклучокот, дека ќе се навратат на ова прашање пред Самитот во Загреб во мај догодина, истакна Туск пред ЕП презентирајќи ги заклучоците од минатонеделниот состанок на Европскиот совет во Брисел.

Се очекува европарламентраците на денешната пленарна дебата уште еднаш да искажат поддршка за старт на преговорите со Скопје и Тирана. Тоа во изминатите денови веќе го направија најголемите политички групации во ЕП – Европската народна партија, Партијата на евроспките социјалисти, АЛДЕ, Партијата на зелените.

На седницата на ЕП ќе бидат разгледани и заклучоците на Советот на ЕУ за Брегзит и за воената интервенција на Турција во Сирија.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.