Триумфот на опозицијата и подготовката за приземјување на неуспешната политика на Зоран Заев се главните пораки на овие избори, оцени Иван Стоилковиќ, претседателот на Демократската партија на Србите по неделниот прв круг од локални избори во таа земја.

Во изјавата за Спутник, Стоилковиќ вели дека опозицијата убедливо победи по првиот круг на локалните избори во Македонија.

Опозициската коалиција наречена „Обнова за Македонија“, од која и ние сме дел, предводена од Христијан Мицкоски, лидерот на најголемата македонска партија ВМРО ДПМНЕ, успеа убедливо да го победи Заев во Македонија и Град Скопје. Ова може да се види од резултатите објавени од Државната изборна комисија. Заклучокот е дека ова беше триумф на опозицијата и подготовка за преземање на власта, или преку ново парламентарно мнозинство, или со распишување на нови парламентарни избори. Во секој случај, Македонија се соочува со жешка политичка есен, а веројатно и зима, а расплетот на настаните на политичката сцена се очекува многу скоро. Постојат неколку можни комбинации, а една од нив е опозицијата веднаш да ја преземе власта. Друга опција е да се чека развојот на настаните во врска со енергетската криза и сѐ друго што го погодува светот, вклучително и Македонија, бидејќи Владата покажа елементарна неспособност да ги реши главните државни проблеми. Се очекува натамошен пад на стандардот и раст на политичката и економската криза, така што опозицијата ќе треба соодветно да процени за наредните потези“, посочува Стоилковиќ во изјавата за Спутник Србија.

На прашањето што значи првата опција, односно дека опозицијата веднаш ја презема власта, Стоилковиќ рече дека станува збор за создавање ново парламентарно мнозинство.

Има неколку партии од блокот на сегашното собраниско мнозинство, а некои од нив доживеаја дебакл на овие избори. Тие дејствуваа независно, па се претпоставува дека нивните лидери ќе се обидат да најдат начин да се спасат, бидејќи постои очигледна тенденција опозицијата да се врати на власт во наредниот период, смета Стоилковиќ.

За тоа што овие избори значат за Србите, Стоилковиќ вели дека имале две цели – да ги поддржат кандидатите на целата опозиција во контекст на референдумот за тоа дали Зоран Заев треба да остане на власт.

Се согласивме со опозициските партии дека што повеќе советнички позиции треба да заземат членовите на српската партија во локалната власт. Ја постигнавме таа цел, успеавме во 14 општини да имаме советници, така што јас сум генерално задоволен кога станува збор за изборните резултати. Од друга страна, како речиси единствена партија која го собира српскиот народ и која, на некој начин, стана национална институција на српскиот народ во Македонија затоа што немаме други национални институции, за нас беше важно да ја задржиме партиската инфраструктура. Верувам дека ова ќе биде клучно во следниот период кога станува збор за подготовките за следните парламентарни избори, кои се надеваме дека ќе се одржат во блиска иднина, посочува Стоилковиќ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.