Синот на Цветанка Иванова добил тендер од државата преку фирмата „ДИКОР ЦД“ ДООЕЛ Струмица од државата за чистење на патиштата во источна Македонија, потсети на денешната прес-конференција Генералниот секретар Игор Јанушев.

Нормално, СДСМ и Владата молчат, него никаде го нема, а мајка му која е генерален секретар на Собранието на Република Македонија не знае дека синот ѝ заработил тендер кој може да достигне вредност од над 300.000 евра. Веројатно станува збор за новогодишно изненадување, па затоа не знаат. Штом молчат, значи нашите изнесени информации на вчерашната прес- конференција се вистинити, вели Јанушев.

Додава и дека синот на Цветанка Иванова, кој воедно е и бизнис партнер на Трајче Заев, под сомнителни околности добива тендер, без да ги исполнува потребните услови и критериуми кои се бараат во истиот.

Имено, фирмата „ДИКОР ЦД“ ДООЕЛ СТРУМИЦА која е во сопственост на синот на Иванова, најпрвин го добила тендерот после повторна евалуација на 8 ноември годинава, па дури после 12 дена на 20 ноември склучува договор со грчка фирма за набавка на потребната механизација од тендерот која имено требало да ја поседува пред добивањето на истиот. Дополнително, банкарската гаранција од фирмата „ДИКОР ЦД“ кон грчката фирма за 25 машини во вредност од околу 200.000 евра од една македонска банка била уплатена дури на 27-ми ноември и дури потоа возилата влегле во Република Македонија. Во моментов истите се распоредени на неколку пунктови низ источна Македонија, и тоа Струмица, Штип, Сарамзалино итн. открива Јанушев.

Според информациите на ВМРО-ДПМНЕ, фирмата „ДИКОР ЦД“ на синот на Цветанка Иванова земала под закуп вкупно 25 возила од грчката фирма и целата сума на закуп за сите возила за цела сезона е во вредност од околу 40.000 евра.

Што значи, синот на Цветанка Иванова, со вложени 40-тина илјади евра ќе заработи над 300.000 евра само за неколку месеци. Очекуваме одговори, но и одговорност. Дали е вистина дека најпрвин тендерот бил добиен од страна на фирмата „ДИКОР ЦД“, а дури потоа се набавувале машините, што е спротивно на условите и критериумите што ги налага самиот тендер? Зошто молчат и Владата, СДСМ и Цветанка Иванова, молчат за овој спорен и сомнителен тендер каде што требале да заработат стотици илјади евра на грбот на државата и граѓаните? Дали обвинителството ќе отвори случај и дали инволвираните ќе сносат одговорност? Кога планира Владата овој тендер да го раскине и да распише нов?, прашува Јанушев, додавајќи дека владата треба даде одговори на овие прашања, а не да молчи.

Доколку сега не се расчистат сите овие сомнителни работи, додава Јанушев, веднаш по доаѓањето на власт на ВМРО-ДПМНЕ по 12 април, доаѓа и обновата на Македонија. И со обновата на Македонија ќе се стави крај на ваквото криминално работење на СДСМ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.