За политиката мислев дека не е мојот свет, но политиката може да биде украдена од многу мал број на луѓе кои мислат дека е нивна. Таа не може да биде само една страна, а да не биде со критика. За нешта што се наш живот, наш идентитет, во Република Македонија решаваат неколкумина, рече Гордана Силјановска Давкова на 18. Конференција на Унија на жени на ВМРО-ДПМНЕ.

Можеби имате заблуда во личностите, но политиката ако не е уметност на можноста, може да ја загрози не само државноста, туку како што вели еден умен британски лорд, таа може да расипе и да корумпира. Многу моќ е опасна, трагајте по авторитет, не заканувајте се, барајте противтежа, оти тоа ќе доведе до вистински одлуки, истакна таа.

Силјановска Давкова наведе дека името е најсилниот знак. Со овој знак се создадени мали и големи нации.

Јас не велам дека ние треба да зборуваме за етнос, мислам на сите граѓани, но правото од АСНОМ значело тогаш на ослободување на Македонија. Сите народи на Балканот ова право го оствариле во 19 и 20 век. Лигата на Народите неславно заврши затоа што не водеше сметка за правата на малите нации, повлече професорката.

Таа додаде дека ќе најде многу правни причини за оспорување на тоа што се случуваше за промена на името на Македонија за внатрешна употреба. Освен политичка, Силјановска Давкова наведе дека има и женска визија и дека во кампањата повеќе ќе биде опкружена со жени.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.