Граѓаните се слободни сами да одлучуваат за кого ќе гласаат во вториот круг, вели претседателот на Алијанса на Албанците, Зијдин Села. Алијансата на Села застана зад професорот Блерим Река, кој доби над 70.000 гласови во првиот круг. Гласовите на Река ќе бидат одлучувачки за вториот круг во кој влегоа Стево Пендаровски и Гордана Силјановска.

За пораките што  Силјановска ги упатува кон гласачите на Река, Села во интервју за 360 степени вели дека тоа е нејзино мислење.

Но изгледа дека политичарите не ја сфатиле пораката, не треба да се обраќаат на партиите туку на граѓаните. Ние не паѓаме под влијание на убавите зборови кои некој ги кажува за нас, додава тој.

Села не одговара конкретно на прашањето дали ќе излезе на гласање на 5- ти мај и вели дека тоа ќе се види на денот на гласањето.

Граѓаните треба да одлучат дали ќе гласаат и за кого. Ние имавме само еден кандидат. На седница на претседателство и ќе градиме став како политичка партија. Но лично јас како претседател на Алијансата, пораките што ги имав за пренесување, а бев многу јасен, ги дадов во кампањата додека имавме кандидат за претседател. Нашата изборна кампања заврши во неделата на 21 април кога ги дознавме резултатите. Кој ќе биде ставот на Алијансата ќе се дознае по седницата на претседателството на партијата. Но нашиот принцип е дека се уште не е дојдено време албанските гласови да одат за македонските политички партии, вели Села и додава дека седницата на претседателството ќе се одржи во среда или четврток следната недела, односно само неколку дена пред одржување на вториот круг.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.