СДСМ и ДУИ бедно и очајно преку медиуми си ја префрлаат одговорноста за трагедијата во модуларната болница во Тетово каде што живи изгореа 14 пациенти, велат од ВМРО-ДПМНЕ.

СДСМ од една страна го штити Филипче и го обвинува директорот на болницата дека тој бил надлежен за контролата и оперативноста на објектот. Од друга страна ДУИ го штити директорот Бесими, брат на министерот за финансии и тврди дека надзорот над градбите на модуларните болници не го правеле акредитирани фирми, велат од ВМРО-ДПМНЕ.

Еве да им помогнеме на коалициските партнери СДСМ и ДУИ, додаваат оттаму и велат – И двете страни сте одговорни за смртта на 14 лица и мора да понесете морална одговорност, а потоа да има и кривична одговорност за оние кои ги прекршиле позитивните акти и ги загрозиле граѓаните.

СДСМ и ДУИ обвинувајќи се меѓу себе откриваат дека немало соодветен надзор на модуларните објекти, немало противпожарен систем за заштита, немало технички прием, немало атестирани материјали, немало ништо што би гарантирало сигурност на пациентите.

Ете зошто за Заев темата за модуларната болница е банална, затоа што дебело е заглавена неговата власт во оваа трагедија. Џабе му е тактизирањето со оставките и обидите да го спаси Филипче по секоја цена. Одговорност мора да има и за директорот на болницата и за заменикот министер Хасани и за министерот Филипче, а бидејќи ги прикрива и штити треба и за Заев, велат од ВМРО-ДПМНЕ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.