Здружението за истражување и анализи (ЗМАИ) на панел дискусија „Подобрување на процесите на локално буџетирање во Македонија“ презентираше наоди од истражување и индексот на отвореност на општините.

Фокусот на истражувањето беше ставен на афирмирање на четири главни компоненти: транспарентност, отчетност, вклученост и поддршка на маргинализираните групи во процесот на планирање и реализирање на општинските буџети.

Резултатите од анкетата покажаа дека граѓаните сметаат оти постои делумна транспарентност во локалниот буџетски процес. Откривме дека 89,6 проценти од граѓаните не го виделе општинскиот буџет или неговата граѓанска верзија (т.е. поедноставена презентација на општинскиот буџет). Додека 95,1 процент од граѓаните ја немаат видено завршната сметка на општинскиот буџет во последните две години. Препораки на нашите истражувачи се: Подобрување на финансиската писменост, Веб-платформа за локални буџети, Законски измени за промовирање на транспарентноста, инклузивноста, одговорноста и правичноста – информираат од ЗМАИ.

Целта на истражувањето било да се предложат начини за подобрување на транспарентноста и вклучувањето на граѓаните во буџетските процеси на локално ниво во Македонија, со цел да се зголемат ефикасноста на локалните буџети и нивото на задоволство на граѓаните за јавното трошење.

Како што велат од ЗМАИ, интервјуата со вработените во локалната самоуправа покажале дека општините организирале формални активности за вклучување на граѓаните во процесот на подготовка на буџетот, главно јавни дебати.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.