И по 3 часот по полноќ продолжува расправата за разрешување на техничката министерка за труд и социјална работа Рашела Мизрахи.

Пратеникот Трајко Димков од ВМРО-ДПМНЕ од собраниската говорнца ѝ се заблагодари на техничката министерка за труд и социјала Рашела Мизрахи за дадената лекција – како се сака сопствената држава. Посочи дека вистинската причина за барањето за нејзино разрешување не е таблата на која пишува Република Македонија, туку затоа што ги открила бројни криминални активности на нејзината претходничка Мила Царовска. Обраќајќи ѝ се на Мизрахи, Димков рече:

Вие вечерва сами ги победивте СДСМ и нивната коалиција, вие сте новата Мирка Гинова. Со ова што го правите се гледа дека само декларативно сте се залагале за соживот. Од каде се овие фашизоидни идеи на една партија. Рашела Мизрахи е единствена Еврејка која сака да ѝ помогне на Македонија и ќе ги загрозите и односите со Израел, рече Димков.

Во продолжението на оваа расправа техничкиот премиер Оливер Спасовиски од СДСМ, кој го побара разрешувањето на Мизрахи, реплицираше на дискусиите на пратениците.

Разговарав со Мизрахи, ѝ дадов шанса. Рече дека ќе демантира дека лошо била разбрана. Но, потоа даде демант во кој рече дека ќе плати 5.000 евра казна, ама нема да ја смени таблата. Е затоа е предлогот за нејзино разрешување, рече Спасовски.

Повтори дека разрешувањето не е ниту оти таа е жена, Еврејка и дека верува во една, друга или трета вера. Според Спасовски, Мизрахи е предложена на местото министер за труд од политичка партија, а не од етничка заедница.

Собранието почна со заседавање во петокот во 19 часот и, како што најави спикерот Талат Џафери, нема да прекине сѐ до распуштање, кое треба да се случи најдоцна во недела на полноќ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.