Собранието со 62 гласа „за“ го поддржа Предлог законот за изменување и дополнување на Законот за лична карта, во прво читање, и го проследи во натамошна процедура.

Министерот за внатрешни работи Оливер Спасовски образложи дека законот е предложен со цел да се испочитуваат уставните одредби што се однесуваат на примената на Договорот од Преспа и Законот за јазиците.

Во овој текст на закон се опфатени двете измени за да можеме практично да ги издаваме новите лични карти со новото уставно име и примена на Законот за јазците, практично на сите заедници кои живеат во Република Македонија кои се наоѓаат во Уставот – изјави Спасовски посочувајќи дека Министерството за внатрешни работи е целосно подготвено за реализација на овој проект.

Тој потсети дека од 1 јули почна издавањето на патни исправи, додека во однос на лични карти граѓаните добиваат термини, се земаат сите податоци, се поднесуваат барања, но производство на личните карти уште не е почнато заради носење на ова законско решение.

Тој додаде дека и во овој закон има дефиниран рок на замена на лични документи, како што е направено и во делот на патните исправи. Личните карти, како што рече, ќе важат во рок наведен во важење на личната карта, најдоцна до 12 февруаври 2024 година. Тогаш граѓаните ќе треба да ги заменат личните карти со нови, кои ќе бидат усогласени со Уставот и со важечките законски прописи.

Пратеникот Павле Трајанов, пак, предложи да се размисли со натамошната постапка за законските измени да се овозможи во личната карта покрај другите податоци да се стави и крвната група на имателот на овој документ.

Се случуваат сообраќајни несреќи и во други кризни состојби исклучително е важно брзо да се интервенира и да се заштити здравјето на граѓаните преку примена крвна плазма – изјави Трајанов.

Во попладневниот дел од работата на Собранието беа донесени и измените на Законот за социјална заштита со кои се овозможи услугата лична асистенција да ја користат и деца од шест годишна возраст со намален функционален капацитет. Со измените се очекува 200 деца да добијат услуга на лична асистенција од 80 часа во текот на еден месец.

Претходно, пратениците ги усвоија и измените на Законот за додадена вредност, со кои даночната стапка за прометот на електричната енергија кон домаќинствата се намалува од 18 проценти на пет проценти, како и Законот за утврдување на јавен интерес и номинирање стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и коридорот 10 Д (делница на автопатот Прилеп – Битола) во Република Македонија, по скратена постапка.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.