Претседателот на Република Македонија, Стево Пендаровски, денеска го прими амбасадорот на Република Албанија, Фатос Река.
На средбата, двајцата соговорници констатираа дека севкупните односи меѓу Република Македонија и Република Албанија, кои се карактеризираат со искрено пријателство и меѓусебно разбирање, бележат позитивен развој со континуиран дијалог.

Претседателот Пендаровски нагласи дека во иднина двете земји треба да се посветат на унапредување на билатералната соработка, особено во областа на економијата и зголемувањето на трговската размена, како и на реализацијата на инфраструктурни проекти кои ги поврзуваат Македонија и Албанија.

Во однос на европските интеграциски процеси, претседателот Пендаровски нагласи дека е неопходно Европската Унија да ги валоризира напорите на двете држави преку одредување датум за почеток на пристапните преговори. Тоа ќе придонесе за дополнителна регионална консолидација и соработка меѓу земјите, беше потенцирано на средбата.

Двајцата соговорници истакнаа дека Македонија и Албанија споделуваат идентични надворешно-политички цели. Двете земји се посветени на градење на добрососедските односи и соработка во рамки на регионалните иницијативи.

Амбасадорот Фатос Река на претседателот Пендаровски му го честиташе стапувањето на функцијата и му посака успех во работата, изразувајќи уверување за натамошно унапредување на билатералната соработка во сите полиња од заеднички интерес.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.