Проблемот со набавката на вакцини за Ковид-19 и натаму е еден од многуте проблеми на граѓаните. Додека во светот и Европа имаме масовна вакцинација, во Македонија набавката на вакцини оди многу тешко. Кога станува збор за набавката на вакцини властите, односно претседателот на државата Стево Пендаровски, премиерот Зоран Заев и министерот за здравство Венко Филипче се со различни изјави за тоа како оди набавката на вакцини и кога државата ќе добие вакцини за граѓаните.

Претседателот Пендаровски во своето гостување на ТВ „21“ пред само два дена, во врска со прашањето за набавката на вакцини посочи дека од „Фајзер“ пред Нова Година им кажале дека во моментот не разговараат со држави помали од два милиони жители.

Можам да споделам со вас една коресподенција која јас и еден од надлежните министри ја имавме со една од најголемите компании, можеби најголема во моментов „Фајзер“, пред Нова година, кога директно се обративме во седиштето на таа компанија во Бостон. Не прашаа која е големината на потенцијалниот пазар, потенцијалните консументи, и кога кажавме дека сме се на се, по старите пописи сме два милиони луѓе, од тоа сме толку малолетни, толку полнолетни пута два, како оди сега во делот на таа вакцина конкретно. Разговорот брзо заврши, бидејќи рекоа во овој момент имале неверојатна навалица на огромни држави со милијарди луѓе потенцијални купувачи и консументи, така што одговорија: „Деловната политика на фирмата во тој момент, не е да разговара со држави кои имаат помалку од два милиони жители“ – изјави Пендаровски.

За разлика од Пендаровски, Заев во месец јануари ги информираше граѓаните дека првите 5.850 вакцини од „Фајзер“ пристигнуваат во февруари.

Првите 5.850 вакцини од компанијата „Фајзер“ пристигнуваат во февруари, ќе се вакцинирам и веднаш ќе го дадам примерот, но без да ги кршам протоколите, да не бидам пред медицинските сестри, докторите, пензионерите или хронично болните – стои во статусот на Заев објавен на 4 јануари.

Но, за да биде уште „поинтересна“ оваа приказна околу лагите на власта за набавката на вакцините не може да не се спомене изјавата на министерот за здравство, Венко Филипче, кој на самиот почеток на годината информираше дека од „Фајзер“ го замолиле да не ја кажува бројката на вакцините која ќе ја добие Македонија.

Од компанијата не замолија се уште да не се објавуваат дозите, иако точно знаеме колку дози треба да стигнат во февруари, колку во март и колку во април. Изминатата недела имавме во континуитет телефонски разговори, разменуваме мејлови со компанијата „Фајзер“ и мислам дека тоа е една политика која успеаја да ја имплементираат заради зголемување на дел од нивното производство – истакна Филипче, одговарајќи на новинарски прашања.

По сето ова, односно по овие три различни изјави, може да са заклучи дека и Пендаровски и Заев и Филипче се дел од криминалот кој сакаат да го направат со вакцините и затоа даваат различни изјави.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.