Со брифинг од вицепремиерот за европски прашања, Бујар Османи, во мисијата на Република Македонија во ЕУ, започна студиската посета на Брисел на студентите од државните универзитети, избрани како најдобри на конкурсот „Со европско знаење до европската престолнина“.

Ви честитам уште еднаш на успехот и ви посакувам успешен студиски престој во Брисел. Вашите ментори сметаат дека сте вие најдоброто од Македонија и се надевам дека таа доверба ќе ј оправдате, а впечатоците и искуството што ќе ги соберете од посетата ќе бидат поттик за вас да продолжите да се едуцирате, и во иднина директно ќе вклучите во процесот на европска трансформација на земјата, им порача Османи.

Тој ги запозна студентите со процесите и предизвиците со кои се соочува земјава во рамките на европските интеграции.

Институциите на ЕУ што ќе ги посетите во рамките на посетата се исклучително важни точки во кои се создаваат политиките на Унијата, но што е уште поважно, тие еден ден ќе бидат и наши институции. Наши претставници ќе седат во Европскиот парламент, ќе учествуваат во работата на Европската комисија, на директоратите, и кој знае, можеби токму некој од вас ќе ја претставува нашата земја токму во нив, рече Османи.

Студентите ги пречека и амбасадорката Агнеза Руси, која им го претстави начинот на кој функционира мисијата на Македонија во ЕУ и одблизу ги запозна со процесите и активностите кои Мисијата ги води во моментов.

На првиот ден од престојот во Брисел студентите ќе ги посетат Европскиот парламент, Советот на Европската Унија, како и Домот на европската историја. Според агендата, веќе од утре ќе ги посетат Советот на Европската Унија, Директоратот за соседство и преговори за проширување на Европската комисија (ДГ НЕАР), Европска служба за надворешно дејствување (ЕЕАС),како и Генералниот директорат за образование и култура (ГД ЕАК).

За време на посетата, студентите ќе се сретнат со Дејвид Кулен – раководител на Одделението за Република Македонија и Косово при ДГ НЕАР, со Сесил Абадие од ЕЕАС задолжен за Република Македонија и координаторот на ЕК за земјава, Марк Јорна и ќе се запознаат со можностите што ги нуди европската програма за едукација и обука „Еразмус плус“.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.