Ниту еден пријавените 15.294 матуранти не отсуствувал од полагањето на државна матура поради изолација како последица на корона вирус, информираше во „Утрински брифинг“ директорката на Државниот испитен центар, Елизабета Наумовска.

Од информациите кои ги добиваме од терен, досега ниту еден ученик не се пријавил дека ќе отсуствува од тестирањето поради изолација или затоа што е позитивен на корона вирус. Сепак, ние овозможуваме доколку има такви ученици со приложено решение за изолација од Центарот за јавно здравје за себе или за член од семејството, да го достават до училиштето а тоа ќе го проследи до нас. Ние за тие ученици ќе овозможиме дополнителен термин за полагање на државна матура на 25 и 28 јуни – информира Наумовска.

Таа, сепак, соопшти дека од тестирањето отсуствувале мал број ученици, но поради други причини и болести. За нив нема да важи можноста за полагање на 25 и 28 јуни, туку ќе треба да го чекаат августовскиот испитен рок. На 11 и 13 август ќе можат да полагаат и матурантите кои нема да положат некој од предметите во јунскиот испитен рок.

Тестовите беа коректни, како што се договаравме со Сојузот на средношклци, немаше трик прашања. Материјалот ќе се подели до екстерни оценувачи избрани на конкурс. Тие до 25 јуни ќе ги прегледуваат тестовите кои се потпишани со бар код, наместо со име и презиме за да се задржи објективноста при оценувањето – објасни Наумовска.

Од вкупниот број пријавени, 7.050 се од гимназиско образование, 7.983 од средно стручно образование и 261 од средно уметничко образование. Македонски јазик и литература ќе полагаат 10.848 кандидати, албански јазик и литература 4.078, 272 – турски јазик и литература.

Вториот екстерен испит, кој е изборен, е закажан за 11 јуни. Учениците се определиле да полагаат англиски, германски, француски јазик, естетика, филозофија, а најмалку се пријавиле да полагаат математика, односно само 1.530 ученика.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.