Никој нема одговорност, а луѓе гинат – топката за нелиценцираниот автобус се префрла од раце в раце

Непосдувањето лиценца за меѓународен превоз на патници за автобусот на туристичката агенција „Беса Транс“ кој вчера се запали и однесе 45 животи според директорот на Државниот инспекторат за транспорт Руфат Хусеини, не е причина за несреќата. Тој денеска во Утрински брифинг се огради од било каква одговорност и пропуст на Државниот инспекторат, посочувајќи дека за да се подобри квалитетот на превоз на патници неопходно е да се купуваат понови возила, кои ќе бидат технички исправни, а за тоа да се погрижи Министерството за внатрешни работи, а станиците за технички преглед да не регистрираат неисправни возила. Воедно додаде дека Ако автобусот навистина немал извод од лиценца на граничниот премин Деве Баир не смееле да го пуштат да ја напушти државата. Вина има МВР, станиците за технички преглед, Царинската управа, но не и Државниот иснпекторат, кој немал доволно инспектори. Секој вината ја турка на другиот, ја фрла топката и на крај никој нема да биде одговорен.

– Ние не знаеме кога е купен и кога е регистриран автобусот. Исто така не знаеме зошто не аплицирал за да добие извод од лиценца. Согласно Законот за транспорт во патниот сообраќај, Царинската управа на граничните премини има овластување и мора да го врати превозникот, доколку не поседува извод од лиценца. Ако автобусот навистина немал извод од лиценца на граничниот премин Деве Баир не смееле да го пуштат да ја напушти државата. Сепак сметам дека овој пропуст не влијаел врз несреќата. Надлежните органи во Бугарија како причинители за несреќата ги наведуваат условите на патот, исправноста на возилото и човечкиот фактор. Никој не го спомена изводот од лиценцата. Сепак треба да го има, ние ќе провериме зошто го нема, но тоа не е одлучувачки фактор во оваа несреќа, нагласува Хусеини.

Превозниците кои организираат меѓународен транспорт на подолги релации треба да имаат двајца или тројца возачи. Честопати самите превозници се обидуваат да го заобиколат ова правило.

– Секој автобус е опремен со дигитален тахограф, а секој возач има тахографска картичка на која се снима времето на возење на еден возач. Секоја компанија има обврска секој 28ми ден во месецот да ги симнува податоците за секој возач. Не е можно да се манипулира со овие податоци иако често се случува возачите да возат со туѓи картички. Со Законот за работно време секој возач може да работи девет саати дневно, но низ државата ние немаме толку долги релации. Има специфичен софтвер за вршење контрола на таквите надзори. Ние сме опремени со шест софтвери и исто толку инспектори. Меѓународниот превоз е малку покомплициран. Ако одиме од Скопје до Виена, има план за возење и во истиот план е наведено колку возачи треба да има во автобусот. Но се прават манипулации. Ако треба да има три возачи во автобусот, често се лаже дека едниот возач го чека во Белград или Загреб, и на тој начин ја поминуваат границата. Доколку се утврди прекршок или непочитување на Законот, прекршителите се казнуваат таму каде што ќе се затекне прекршокот, објаснува Хусеини.

Тој вели дека несреќата не е доволен причинител за да се одземе лиценцата за превоз на „Беса Транс“.

– За да се одземе лиценца треба компанијата да нема доволен број возачи. На пример ако имаат десет автобуси треба да имаат вработено десет возачи. Ние ќе вршиме надзор во „Беса Транс“ и во зависност од тоа што ќе произлезе од надзорот ќе дадеме предлог до Министерството за транспорт да се одземе лиценцата. Во 2021 година извршивме четири надзори на граничниот премин Деве Баир, но освен непочитување на ковид протоколите, други неправилности не беа пронајдени, вели директорот на Државниот инспекторат за транспорт.

Има ли редовна инспекциска контрола кај превозниците? Според него најголем проблем е недоволниот број инспектори.

– Најголем проблем е што немаме доволен број на инспектори. Во моментов имаме 12 инспектори, а тоа е недоволен број за да се направи надрзор на сите компании кои вршат превоз на патници и на стока. Поради тоа трпи и инспекцискиот надзор. Од оваа автобуска несреќа и од несреќата кај Ласкарци научивме дека треба да се подобри состојбата во цела држава за да нема вакви несреќи. Тоа значи дека треба компаниите да имаат подобри и понови возила, а доколку немаат, старите и неисправни возила да не се регистрираат, односно да не можат да поминат на технички преглед. Одговорност не треба да се бара само кај Инспекторатот за транспорт туку и кај МВР и станиците за технички преглед, додава Хусеини и нагласува дека досега ретко се случувало да има преоптовареност на возилото односно да се продадени повеќе билети отколку што има капацитет.

Хусеини е директор на Инспекторатот долги години. Тој е родум од Зајас, земјак на лидерот на ДУИ, Али Ахмети. Индиректно ја префрла топката на Царинската управа, МВР и техничките станици.

И во текот на претходната несреќа со автобусот на Дурмо Турс се бараше одговорност од Државниот инспекторат за транспорт, Руфат Хусеини што дозволил исправноста на автобусите на туристичката агенција „Дурмо турс“ да ги проверува во фирмата „АМЗ Гостивар“, која има ист сопственик, но и тогаш Хусеини се огради – рече дека немаат ингеренции врз станиците за технички преглед.

„Во нашиот закон не е обработено дали еден газда може да има станица за технички преглед и истовремено да биде превозник. Кај нас во законот стои дека ние при контролите треба да утврдиме дали возилото е регистрирано и дали е извршен технички преглед. Такви документи при контролите утврдивме дека ‘Дурмо турс’ има. Станиците за технички преглед се обврска на Министерството за внатрешни работи“, изјави тогаш Хусеини.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.