Повеќе од 250 медицински сестри со високо образование реагираат дека доколку надлежните не најдат начин да им ги признаат дипломите – правда ќе бараат преку протести и наместо на работа во болница, ќе излезат на улица.

Тие се револтирани од односот на надлежните кои со години ги игорираат нивните барања и топката ја префрлаат од една во друга институција.

Како то објави „Алфа“, медицинските сестри бараат измени на Законот кој ќе ги штити нивните права.

Ние сме единствена струка во Македонија која не е опишана со Закон. И бараме законот под итно да биде донесен, бараме поддршка од сите народни избраници и од власта и од опозицијата што е можно побрзо да се донесат законски измени и образованието да ни биде признаено – вели Сашо Илиески од ГОБ „8 Септември“.

Од Здружението „За нас“ алармираат дека пандемијата исфрлила на површина бројни проблеми во здравството. Тие обвинуваат за партиски унапредувања, а велат и дека сестрите во ковид одделенијата не добиле ниту денар покачување на основната плата.

И од тука сега почнува таа голгота, баравме директорот ни рече чекајте ќе ви кажеме, баравме немаме финасиска согласност… и почнуваат префрлањата на топките, во Министерство за финансии немаме финансиска согласност, па во болниците ќе им речат одете во Министерството за здравство или мораме да го прашаме МЗ, па Министерството ќе им одговори на болниците, ние не го одлучуваме тоа вие ќе го одлучите. И сето тоа е на грбот на медицинските сестри, еден круг во кој се вртат овие медицински сестри и остануваат со непризнаено високо орбазование и на индивидуални начини по партиски линии, на жалост, некои ќе си го решат статусот и ќе расте револтот кај сите други во болниците – вели Гордана Бешлиовска од Унијата ЗМСТАС.

Министерот за здравство, Филипче, пак, смирува и највува дека финансии за овој медицински кадар ќе се најдат, но потребна била систематизација во здравствените установи.

Да се направи финансиска анализа, но во исто време и анализа на систематизациите во ЈЗУ, да се види каде за кого има места во систематизацијата и врз основа на тоа да изготвиме некакво долгорочно решение – вели Филипче.

Во моментов, во трите високо образовни школи во земјава се едуцираат околу 1.500 медицински сестри.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.