Министерството за здравство тврди дека пациентите кои се болни од епилепсија се соодветно покриени со терапија и покрај тоа што родителите на деца со епи-напади се жалат дека неопходните дијазепам чепчиња ги нема со месеци, а реагираат и болните дека лековите кои им се непоходни, со месеци се дефицитарни.

Во рок од три дена имам поминато 24 аптеки, 1 лекар специјалист невролог и 1 матичен лекар. Станува збор за процедура што ја поминувам скоро секој месец во потрага по дефицитарниот лек оксалепт за третирање на епилепсија – реагира болен од епилепсија кој својата мака ја сподели на социјалните мрежи.

Тоj преку социјалните мрежи порача дека лековите од типот на тегретол, окскарбамазепин и трилептал се дефицитарни со месеци.

Лекот „окскарбамазепин“  (Oxalept, Trileptal) од производителот Teva Izrael во моментов не се произведува и од таа причина веледрогериите не можат да го дистрибуираат и го нема во аптеките, велат од Министерството за здравство.

Според Министерството, пациентите кои болни од епилепсија, се соодветно покриени со терапија, зашто лекот „тeргетол“ и неговата генерика (carbamazepin) ги има во аптеките и истите можат да се подигнат.

За таа цел, пациентите кои се на терапија со okskarbazepin во континуитет се информираат и им се појаснува дека потребно е да се јават кај своите матични невролози за промена на терапијата, додаваат од Министерството.

Болните од епилепсија во суштина навистина немаат време.

Значи, јас кога секое пакетче на лекови ќе ми дојде при крај, цел град го поминувам секој ден по аптеки барам лекови, се јавувам по други градови каде што би можеле да имаат лекови, па спремен сум да тргнам уште истиот ден во друг град, се јавувам по веледрогерии, по невролози и што ли уште не. Ова е дневна борба на лицата со епилепсија. Во основата на појава на епилептичните напади е стресот, барем од моето искуство. Ова е една толку стресна и грчевита состојба, состојба на непредвливост во којашто не знаете како ќе завршите со потрага по нешто без коешто не можете да живеете. Живеењето во помисла дека имате само 2 или 3 таблети во вашиот дом е една толку стресна состојба што дополнително ги влошува нашите состојби, вели лице кое е болно од епилпсија.

Маката на ова момче ја имаат многумина. Родителите се жалат дека не можат да најдат дијазепам супозитории кои ги користат за децата со епи-напади, но и при висока температура и фебрилна конвулзија.

Во Македонија нема дијазепам чепчиња! Јака произведувале и само Јака, го затвориле погонот… Како сега родителите да обезбедат за потребите на нивните деца? Македонија се претвара во пустина? За која Европа зборите! – реагира мајка за чие дете и е неопходна набавката на овој лек.

Овој проблем трае веќе некое време, некаде од септември минатата година, кога по аптеките се потрошени залихите кои имале се уште важечки рок на траење.

Чепчиња диазепам од 5мг нема никаде, со образложение дека Јака Радовиш не работи. Неопходни ни се за епи напади. Доколку некој има инфо за залиха, замолувам да сподели, бараше преку Твитер мајка лек за своето дете во декември минатата година.

И после 7-8 месеци решение за овој проблем нема.

Немаме ни дијазепам, ниту некаква замена за тој лек. Ако можете отидете до Србија, таму ќе најдете. Ако имате дома со заостанат рок не ги фрлајте, ќе ви завршат работа – ни рече аптекарка кога прашавме за овој лек.

Родителите кои имаат деца со епи напади посочуваат дека и Грција и Германија се земји од каде набавуваат средства кои им се неопходни.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.