Обезбедување услови за претседателски избори и реформските закони, беа темите на вечерашната две и пол часовната средба во Владата, на лидерот на ВМРО-ДПМНЕ, Христијан Мицкоски и премиерот Зоран Заев.
Средбата беше корисна за релаксирање на политичката атмосфера. Во првиот дел ги изнесовме забелешките дека има политички прогон и партиски вработувања. Дополнително потенциравме каде имавме неправилности при референдумот. Во вториот дел разговаравме за СЈО. Значајно е дека ова обвинителство го загуби кредибилитетот кај нас. Новиот закон за обвинителство треба да биде разгледуван во работните групи од сите партии, рече Мицкоски.
Ние предлог текстот го добивме во четвртокот. Немавме време да го разгледаме составот, но според нас постоечкиот тим не треба да ја добие довербата. Но, сепак треба да ги отвориме темите и за тоа ќе се дебатира. Претседателот на Владата се согласува да ги отвориме сите теми, рече Мицкоски.
Тој рече дека е договорена оперативна комуникација за двата штаба на претседателските кандидати.
Немам гаранција дека процесот ќе биде фер и демократски, но се надеваме дека оваа средба треба да придонесе за довербата. Сепак ние остануваме зад барањето за предвремени избори и очекуваме нашиот кандидат за претседател Гордана Силјановска Давкова да победи, вели лидерот на опозицијата.
Иако Законот за обвинителство е суштествен за преговорите, тој вели дека нема да брзаат и додека законот не биде донесен како што треба, нема да биде донесен под притисок.
Тимовите ќе работат интензивно, но сепак нема да брзаат.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Comments are closed for this post.