Министерот за правда, Бојан Маричиќ уверува дека преговори или разговори околу македонскиот јазик и идентитет нема да има. Може да се разговара, како што вели, само за динамиката и за начините на спроведување на Договорот за добрососедство.

Маричиќ во вечерашното интервју за „Еурофокус“ на ТВ Телма нагласува дека нашата европска иднина не може да зависи од тоа дали можеме да бидеме Македонци и да зборуваме македонски јазаик. Тоа право ни е гарантирано со сите универзални меѓународни декларации и со принципите на ЕУ.

Според Маричиќ, македонската страна има свои ставови, но одредени прашања од историјата може да се дискутираат, но антифасиштичкиот темел на македонската држава не доаѓал под прашање.

На целата наша јавност треба да и е јасно и убеден сум дека и е јасно – ние ниту сакаме, ниту можеме да се откажеме од она што сме и од она што сме биле, како Македонци кои зборуваат македонски јазик. Интерпретацијата на определени фази од историјата каде што сме имале личности или настани што не врзуваат со Бугарија или може да ги третираме како заеднички или споделени, е нешто сосема друго и тоа е вредно за разгледување и за потенцирање, за евентуално научно предизвикување на некои вистини од нашата историографија, но тоа, по мое мислење, е работа на историчарите, дециден е министерот.

Според него, задача на политичарите е да одржуваат позитивна клима во која нема да има говор на омраза и предрасуди, туку ќе има разговор.

И тука е одговорноста и на нашата страна и на Бугарија. Затоа мислам дека напорите да најдеме решение тука се важни зашто нашата европска иднина не може да зависи од тоа дали можеме да бидеме Македонци и да зборуваме македонски јазаик. Тоа право ни е гарантирано со сите универзални меѓународни декларации и со принципите на ЕУ. Затоа мислам дека немаме простор за тоа да разговараме, но можеме да направиме еден вид план како да се спроведува Договорот и кои прашања би се разгледувале во неговото спроведување, нагласи Маричиќ.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.